Amen cu Sanger ta un novela skirbi pa e autor Joshuar Gomez cu a keda publica na aña 2020. Den 227 pagina e lector ta cera conoci cu e bida tristo, pero yena cu speransa di e protagonista Alex. E buki ta skirbi cu frasenan bunita y cu uzo di diferente simbologia y metafora. Den monologonan interior fiolosifcamente y poeticamente skirbi, bo ta siña conoce Alex cu su dudanan, insiguridad, anhelo y miedo pa tur e monsternan cu ta invadi su existencia. Di tal manera e escritor ta demosta cu berdaderamente e tin talento pa comberti texto den emocion. Su uzo di palabranan y frasenan, ta mustra cu e tin un bon conicimento di obranan y teorianan literario: e ta crea un tension y emocion mediante frasenan y structura di e novela.
Mi semper a sinti cu e peso di un palabra ta depende di e importancia cu abo ta dun’e. Tanten cu un palabra ta permanece tabu, abo ta esun cu ta sigui otorg’e espacio pa haci bo daño. Ami ta kere cu na momento cu bo tuma e palabra aki den bo posesion y normalisa su uzo, bo ta destrui e poder cu esaki tin den boca di otro (57).
Den 25 capitulo ta nara e storia di Alex unda cu e lector ta cera conoci cu e personahe aki, su famia, su bario y scol. E novela ta construi den un forma no-cronologio, uzando analepsis (flash-back) y monologonan interior. E storia tin un narado extradiegetico, pero tin fragmentonan unda ta parce cu bo ta scucha e bos di e escritor mes via di su pensamentonan. E titulonan di e capitulonan ta parce di ta citanan di un otro narado, kisas esaki tambe ta e bos di Alex manifestando su mes pa exigi su espacio? Di pagina 193 te cu 195 bo ta haya e protagonista mes ta tuma over e naracion y den e ultimo capitulo tin un carta di un di e personahenan. Di tal manera e autor ta keda hunga cu e perspectiva y structura haciendo uzo di diferente tipo di naracion. Door di e diferente linea di storia cu ta keda cambia, esaki ta bay intensificando e sintimento di e protagonista. Hasta tin un fragmento den e buki (pagina 219) saca di un parti di un corant cu ta enfrenta tanto e personahe principal como e lector cu un noticia inespera. Cu esaki e autor ta haci un referencia na un acontecimento real loke ta causa un chock na e lector cu ta cuminsa pone e novela den un otro perspectiva, keriendo cu no ta trata di ficcion, sino di un caso real. Esaki ta djis un otro wega of trampa literario di e autor?
Pa bo ta abiertamente diferente, bo mester acepta e riesgonan di un contraatake normativo constante (107).
Loke ta haci e novela interesante ta e difrente temanan cu ta un tabu riba nos isla. E tema principal ta e bida di un hoben homosexual y su desesperacion pa por forma parti di e sociedad cu ta keda rechas’e. E no tin un luga unda e por scapa di prehuicionan sofocante: na su cas e no ta haya ningun clase di cariño y na scol e ta obhetivo di burla, maltrato of un neglisha sofocante. Unda cu si e por sinti trankilidad, su propio pensamentonan ta keda torment’e. Banda di e tema aki, bo ta contra cu otro temanan clave den e sociedad local y den literatura Caribeño: machismo, alcoholismo, abuso domestico, discriminacion, indoctrinacion religioso, redo y trauma, pero no obstante e buki ta un ‘coming of age’ cu tin tambe e temaman di (buskeda di) amor y amistad.
Pero e ansiedad di ainda por, kier y mester mas, ta bula rond den shelo manera un warawara wardando e momento oportuno pa claba su pik den su curpa sin bida (72).
E fragmentonan explicito den un relacion homosexual ta algo unico den literatura di Aruba y e escena di erotismo pa Jesus colga na su cruz algo sumamente tribi y desafiante den literatura mundial. Esaki ta exigi curashi y ta kibra cu otro tabu mas existente riba e isla. E ta un drama social cu critica na un sociedad hipocrita cu prehuicio pa tur loke ta otro, diferente na e standard cu e isla mes a crea pa asina e por acomoda su mes, aunke e ta kibrando cu tur e reglanan di huminidad, discriminacion y respet a base di creencianan tradicional, religion, machismo y nacionalismo. E standard ta acepta maltrato, abuso, termento, exclusion y rechazo, pero tanten bo no ta homosexual. Esey ta e ‘malesa’ of ‘castigo’ mas grandi cu tin y ta haci bo e obhetivo di tur burla, maltrato y humiliacion permisibel. Otredad ta repugnante, p’esey ‘haci drechi’ y ‘bira homber’ ta e norma.
Cu su novela, e autor ta deconstrui e branding turistico di Aruba como ‘One Happy Island’, un mundo di fantasia cu ta e obhetivo di e habitantenan mes, scondiendo asina di e realidad cruel riba e isla.
Mi ta sinti comosifuera mi ta hogando den un estado di vigila constante, na unda mi ta rebiba trauma tras di trauma, bes tras di bes (198).
Gomez a bin cu un buki impactante y impresionante. Kisas e narado mester tabata menos explicito den e storia, laga mas espacio habri y mas misterioso pa asina e lector mes mester haci esfuerso pa saca su conclusion, keda den duda y frustra cu e imposibilidad di sa tur cos. E novela ta basta cera y concreto, pero logicamente esaki ta trata di un preferencia literario.
Amen cu Sanger, Joshuar Gomez
Red Soil Publishing, Den Haag, 2020
