Parti 1: Identidad Indigena bou lens di pureza di sanger
Di tur e mitonan cu ta rondona Historia Caquetio, ningun ta mas popular cu e mito di e fayecimento di e ultimo Indigena Arubiano na aña 1840. Cada yiu di tera cu busca pa sa un poco mas di su historia, lo topa cu un relato, buki of website cu ta describi e desaparicion of extincion di e pueblo Caquetio. E mito aki ta apenas 1 ehempel di e genocidio (fisico y) cultural cu pa mas di 500 aña caba ta asota e Caquetionan di Aruba, y ta sigui prospera bou di nos propio nanishi.
Pa compronde con e mitonan aki a logra adkiri un nivel halto di credibilidad den transcurso di tempo, ta importante pa reconoce con nan a y ta sigui reenforsa e presente di un pasado di colonisacion. Esaki pa motibo cu mitonan di extincion indigena ta nace for di e naturalesa inherente di colonisacion mesoamericano, cual ta pa elimina e nativonan. Pa splica con esaki a manifesta su mes den nos structura social, mi ta cita un pasashi di mi obra literario cu e titulo tentativo ‘Caquetio ta Nos’ cu lo keda publica na 2022:
Pero Watiwati, precisamente esey ta e poder di colonialismo … Colonialismo ta mas cu solamente e acto di sclavisa un pueblo y kita nan cunucu for di nan. E colonisado ta horta bo tera, bo historia, bo cultura, bo educacion y hasta bo identidad. Con e ta hacie? Wel, … e ta drey bo dilanti pa robes te ora cu bo no por ni reconoce bo mes mas! E ta forsa bo siña un idioma stranhero y prohibi bo di papia bo idioma natal. E ta forsa bo bandona bo religion, bo cultura, bo creencianan y ta exigi bo adopta esunnan di dje. E ta hinca bo yiunan den scolnan Catolico, bou di e pretexto di ofrece nan un educacion, pero ta siña nan pa rechasa nan mes y di unda nan ta bini. Prome cu bo sa, e yiunan di bo pueblo no ta compronde bo idioma mas, no por comunica cu bo grandinan mas y consecuentemente no ta siña nada tocante nan cultura Indigena. Juffrouw Lucia ta un di e muchanan aki. Un mucha cu a bay scol unda nan a siñ’e tur locual e colonisado a skirbi p’e y tabata kier pa e sa. Y awor, aunke e ta un docente studia y cu bon intencion, e unico cos cu juffrouw Lucia sa y por siña boso, ta perspectivanan colonial. (Gomez, 2022)
Te cu october 2021, e ta un anomalia pa un Arubiano identifica su mes publicamente como Caquetio. Esaki pa motibo cu socialmente, un Indigena Arubiano cu culturalmente, geneticamente y genealogicamente ta bini di un famia Caquetio, tin cu prueba e legitimidad di su indigeinidad pa por participa cu credibilidad den e skirbimento di nos historia. Un historia cual, cu excepcion di esfuersonan reciente di historiadonan local, semper tabata domina pa autornan Europeo.
Consciente y inconscientemente, e Arubiano a wordo condiciona pa ignora e relevancia di su bos den locual mester ta discusionnan colectivo tocante con nos Arubianonan ta identifica nos mes. Incluso un Arubiano indigena cu por a crece ariba cunucu, rondona di custumber y creecianan Caquetio, no ta posee e abilidad di mira su mes den spiel y reconoce e herencia aki den su refleho. Esaki pa motibo cu el a crece indoctrina cu mitonan di Caquetionan extinto. Consecuentemente, ora un Arubiano wordo confronta cu un persona cu ta identifica su mes como Indigena of Caquetio, e reaccion natural ta pa ridiculisa of cuestiona e autenticidad di e persona aki su identidad.
Los di su contexto historico, no tin un problema constituyente den e uzo metodico di genetica y genealogia pa reenforsa bo identidad Indigena. Particularmente den Caribe unda colonialismo y sclavitud a laga hopi di nos sin un laso estrecho cu e pais di origen di nos antepasadonan. Sinembargo, historicamente e reglanan pa determina autenticidad Indigena a wordo diseña pa e propio colonisadonan, cu e unico meta di invalida e identidad di mas hopi hende indigena posibel. Di e forma aki, hortando e pueblo di proteccion contra sclavitud, discriminacion y cualkier otro derecho ariba tera, recurso y ayudo estatal. Aruba no a scapa di e practica aki y asina a nace criterionan social manera: Un Indigena di berdad mester tin sanger puro; Un Indigena di berdad mester conoce su cultura, religion y idioma; Un Caquetio di berdad no por ta multi-racial ni tampoco ta asimila den e sociedad multicultural di Aruba y te hasta Un Caquetio lo mester mustra manera tur otro Indigena di region pa por ta uno di berdad: Bruin, cabey preto y wowo chikito. “Sino, bo no ta Indjan! …”
Na momento cu ningun persona Indigena por cumpli cu e rekisitonan aki, ni tampoco nan descendientenan, e colonisado ta exitosamente logra comete un genocidia di identidad y propaga e idea cu e Arubianonan Indigena a finalmente a disparce. Y e manipulacion historico aki ta traha asina efectivamente, pasobra e ta basa ariba un kader di criterio imposibel, crea pa e propio colonisado cu ta responsabel pa existencia di indigenanan multiracial y e destruccion di lenguage, cultura y spiritualidad Caquetio pa medio di asimilacion obligatorio.
Un posibel argumento contra e ponencia cu 'pureza di sanger ta afecta e status y historia di Caquetionan na Aruba', ta cu akinan nos no conoce teritorionan (reservations) indigena, ni tampoco beneficionan estatal pa personanan cu por prueba di tin sanger Caquetio; Y cu p’esey, pureza di sanger (blood quantum) lo no tin efecto na Aruba. E prome parti di e argumento ta berdad. Teritorionan indigena y beneficionan estatal no ta un sistema cu Aruba conoce. Sinembargo, e relevancia di porcentahe di sanger no ta den locual e Caquetionan ta ricibi na Aruba, sino locual nan ta perde a base di sistema aki. Na Aruba, pureza di sanger ta e metodo cu ta wordo uza pa invalida e existencia di Arubianonan Indigena den institutonan educativo, cultural y comercial. Incluso nos Museo Nacional Arqueologico, cu ta probablemente e instituto local mas avansa y progresista den su mision pa conta un historia Indigena decolonisa, ta uza pureza di sanger pa crea un capitulo final den e existencia di Caquetionan Arubiano. Un ehempel di esaki ta e utilisacion di e fayecimento di e Caquetio Nicolaas Pyclas, cu segun historia oral lo tabata e ultimo Caquetio di sanger puro, pa marca un etapa final den historia di Aruba. Considerando e punto aki, na momento cu institutonan cu poder educativo ta reconoce e indigeinidad di Caquetionan di sanger puro, pero no esun di nan descendientenan multiracial, pureza di sanger ta permanece un factor di peso den e existencia, reconocimiento y validez publico di Arubianonan Indigena.
Pa culmina e prome parti di e blog series aki, ta importante pa nos reflexiona ariba nos uzo consciente y inconsciente di structuranan colonial (manera pureza di sanger) cu ta preveni Arubianonan Caquetio di cura, reconecta y reapropia sin miedo nan identidad Indigena. Mundialmente, e discursonan rond di identidad racial ta experenciando un desaroyo rapido cu ta urgi nos tur pa studia e origen di nos prehuicio y desinteres den combersacionnan local tocante nos identidad; cual ta un topico interconecta cu desigualdadnan social, economico y politico. Awor mas cu nunca, ta importante pa e combersacionnan aki wordo lidera pa Arubianonan Indigena cu kier percura di tin un bos den e determinacion di nan existencia y skirbimento di nan propio historia. Un historia di hendenan bibo, presente y persistente …
