Mas Arubiano Afro-Indigeno mester skirbi tocante e pasado y presente di sclavitud na Aruba!

Si bo puntra un Arubiano kico e sa tocante e historia di sclavitud na Aruba, e lo probablemente contesta bo cu e no sa nada. Si bo tin suerte, un Arubiano mas studia lo contesta bo:

“Aruba no a conoce sclavitud den gran escala. Nan tabata yuda cu cosnan chikito paden y rond di cas y tabata hasta forma parti di e famia!”

Un parti dimi lo kier sacudi e Arubiano aki y zundr’e pa su falta di conocemento! Pero con mi ta responsabilisa un pueblo pa su ignorancia, na momento cu nos ta biba ariba un Isla unda tin un scarsedad critico di literatura historico y unda e poco cu tini, ta skirbi for di un perspectiva Hulandes y Colonista?

Cu Aruba “dibaina a conoce sclavitud” ta un manera incorecto pa bisa cu Aruba dibaina a conoce e interes pa papia, skirbi y concientisa pueblo tocante e historia di sclavitud na Aruba.

Slavernij op Aruba
Un grupo Arowak en Karaiben.
Fuente: Tropenmuseum Royal Tropical Institute

Pa compronde fey unda e pensamento aki ta origina, nos mester djis tuma un bista den e literatura existente. Un gran parti di nos fuentenan di informacion online y bukinan historico ta basa ariba e trabounan di Dr. Johan Hartog, e escritor di e.o. “Aruba, zoals het was, zoals het werd: van de tijd der indianen tot op heden.” Hartog tabata un bibliotecario Hulandes cu a contribui significantemente na nos literatura historico, Pero alabes, e tabata un escritor cu a ignora por completo e elemento humano y psicologico di esclavonan na Aruba. Den su buki “Short history of Aruba”, un resumen di Aruba su historia, e palabra esclavo ta aparece brevemente na dos ocasion pa comenta:

“Europeans brought along their servants, slaves in this case. The number of negroid immigrants in Aruba remained negligible as compared to the other Islands.”

A pesar cu na aña 1857, 17 % di e populacion Arubano tabata esclavonan preto y Indjan, tanto Hartog como otro historiadonan ta neglisha e importancia di sclavitud den nos literatura historico. Curiosamente, e buki “Short history of Aruba” ta culmina cu un lista extenso di sucesonan importante desde aña ±1500 sin haci mencion algun di sclavitud. E actitud negligente rond di e tema di sclavitud ta un problema hopi mas grandi cu djis falta di literatura. Tanto sclavitud como colonialismo a laga rasgonan permanente den e bida economico, social y psicologico di e pueblo Arubano, cu consciente of inconscientemente ta oprimi e sintimentonan aki.

Fuente: DutchCaribbeanRoots

Tuma nota di cuanto Arubiano ta describi of categorisa nan mes como personanan blanco! A pesar cu e gran mayoria di Arubianonan ta facilmente triracial (Blanco, Indigeno y Africano), e Arubiano di color lo ta e prome pa nenga su rasgonan Africano of Indigeno. Na momento cu e yiunan di un pueblo ta cora menera un mispel den cunucu y nan cabey ta scur manera stropi di calbas, pero toch den nan refleho nan ta mira un imagen Europeo, tin un problema hopi serio di aceptacion, perspectiva y identificacion.

Un pueblo cu no por identifica su mes cu e historia di su pais, lo nunca biba liber di e cadenanan di sclavitud. Identificacion ta e prome paso pa por acepta bo mes como persona y tambe como miembro di un comunidad cu ta comparti hunto un pasado y un presente cultural. Pero e proceso di identifiacion aki no por cuminsa te ora cu nos cuminsa critica y skirbi nos mesun historia for di un perspectiva husto y di color. Te cu dia di awe, e historia di nos antepasadonan esclavo ta wordo skirbi di un forma cinico y descabeya!

Cu esaki mi ta haci referencia na academiconan di Aruba cu no ta adresa e gravedad di sclavitud y e dañonan permanente cu esaki a causa den e salud sociomental y autoretrato di e comunidad Afro-Indigeno. Pio ainda, esnan cu ta skirbi tocante sclavitud na Aruba ta bay asina leu pa describi e experiencia di nos antepasadonan esclavo fey un perspectiva blanco y colonista. Por ehempel, den e buki “De kolibri op de rots,” manera hopi otro escritornan den pasado, Bongers ta papia di un sclavitud benigno. Mi ta bisa benigno pasobra e autor ta haci un distincion entre sclavitud severo y un sclavitud “pasabel.”

“De behandeling van de slaven op Aruba mag als mild worden aangemerkt”

Fuente: DutchCaribbeanRoots

E tipo di ponencianan aki ta problematico pasobra nan describi e experiencia di un esclavo for di e perspectiva di su Shon, su master, su secuestrado. E intencion di Bongers ta pa describi un diferencia entre sclavitud na Aruba y otro partinan den Caribe unda tin un documentacion mas extenso tocante e maltrato di esclavonan. Diferencianan encuanto cantidad, origen y status ta hechonan obhetivo cu berdad ta importante pa menciona. Sinembargo, e autor ta abusa di su licencia na momento cu e ta purba papia di e experiencia y e sintimientonan di un esclavo for di e perpectiva opresor.

“Gevallen van weglopen of vluchtpogingen waren er nauwelijks, omdat de slaaf hier veelal als huisgenoot werd beschouwd.” – Bongers (De kolibri op de rots)

Omdat de meeste huishoudens niet zoveel slaven hebben, groeit er vaak een soort familieband tussen de eigenaren en de slaven. […] De slavenmeesters zijn wettelijk verplicht om regelmatig voedsel uit te delen aan de slaven. […] Dat geeft de slaven een voordeel: zij hebben min of meer gegarandeerd te eten en dat kan niet iedereen op het straatarme Aruba zeggen. – Luc Alofs (slavernijenjij.nl ‘Rebel van Aruba’)

Een gevolg van de beperkte omvang van de Arubaanse slavernij was dat de slaaf minder als onpersoonlijke productiekarakter werd beschouwd, terwijl de ‘huishoudelijke omgang’ een menselijke – maar paternalistische – band tussen eigenaar en slaaf mogelijk maakte.” […] de mogelijkheden tot het volgen van onderwijs, het vormen van gezinnen, de hoge geboortecijfers en de alledaagse bewegingsvrijheid onderscheidde de Arubaanse slavernij zich in positieve zin van de plantage-eilanden.” Luc Alofs (Slaven zonder plantage)

E interpretacionnan aki ta ignora e hecho cu sclavitud ta mas cu djis un secuestro fisico. Na momento cu un persona ta wordo forsa den sclavitud, e ta perde su libertad, su bos y e derecho ariba su mesun pensamentonan. Similarmente, un mucha cu ta nace den sclavitud, ta nace oprimi, sumiso y conformista. Caracteristicanan cu ta cuadra perfectamente cu e cultura di miedo cu a prevalece ariba nos Isla y cu ainda nos tur ta sufri di dje. Teniendo e aspecto psicologico di sclavitud na cuenta, e habito literario di papia tocante lasonan familiar boluntario of e uso di palabranan manera ‘migrante’ of ‘mudamento’ pa describi e experiencia di un esclavo, mester wordo descurasha.

For di un punto di bista academico, historiadonan manera Alofs, Bongers y Hartog ta trece un persfectiva suficientemente interesante pa un forma un debate. Pero tin un problema hopi grandi: no tin niun hende pa debati cu nan!

Tanten cu e nos ( e sector educativo, turistico y cultural ) sigui canonisa e trabounan di escritornan manera Hartog y Alofs, sin skirbi for di nos mesun perfectiva, e perspectiva di un Arubiano di color, un Arubiano descendiente di esclavonan preto y indigeno, nos ta e haci e bentana pa discusion asina chikito, cu e Historia di sclavitud na Aruba por wordo dobla y reforma na gusto sin cu ta keda espacio pa represenation y consecuentemente, identificasion.

P’esey ta esencial pa mas Arubiano di color cuminsa skirbi tocante e pasado y presente di sclavitud na Aruba!

https://www.instagram.com/joshuargomez/

HET GEBRUIK VAN RETABLOS EN EX-VOTOS DOOR FRIDA KAHLO

November 25, 2019

Leave a Reply

Your email address will not be published. Required fields are marked *