Tartamudo (2019) ta un obra literario di e autor Arubiano Joe Fortin. Tartamudo ta contene diesdos storia cortico cu ta mescla diferente nivel di realidad. E storianan ta hiba e lector den un laberinto di duda sin salida, cu e intencion di confundi y despista.
Tartamudo ta conta con e personahenan ta perde control riba nan bida cotidiano y ta bruha e diferente realidadnan cu nan propio fantasia y deseonan. Ta existi duda entre loke ta pasando di berdad y loke ta djis un creacion di nan mente. Mientras cu nan ta desea di por pertenece, cada bes nan ta distanciando nan mes mas, combirtiendo den sernan solitario cu pasionnan straño y excesivo.
Siguientemente, un pasashi for di e buki Tartamudo (2019):
Cu melancolia pa e tempo perdi y pa e ausencia di recuerdonan inventa, mi a para na e skelet di e entrada un rato prome cu mi a dicidi di drenta e luga aki atrobe. E luga ta un ruina bandona memey di e soledad di stof y e bashi di silencio rondona pa cachonan tristo di sarna y hamber. E muraya ta pela desvelando un caos di diferente colonan y e pasado den fasenan cronologico. Riba suela den un skina scur tapa pa mi propio sombra mi a mira loke tabata parce e wesonan di un cabes di toro y e restonan di un ser humano. E tabata exisiti di berdad, mi a pensa den un instante, mescos cu e fantasma cu a caba di papia cu mi.
Otro bukinan cu Joe a publica ta un compilacion di storia cortico titula ‘City store’ (2013) y un coleccion di poema titula ‘Canto di lama’ (2016), tur dos disponibel como e-book ariba Red Soil Publishing.
What others are saying
There are no contributions yet.