Canto di Lama (Ebook)

Cu un interesante compilacion di poema bou di e titulo ‘Canto di lama’ (2018), e escritor Arubiano Joe Fortin a debuta como poeta. E tema di su poemanan ta entre otro, soledad y amistad, melancolia y deseo. Joe fortin ta uza un metodo di autoreflexion, combina cu recuerdonan y elementonan di naturalesa pa trece cada poema den e obra aki na bida. Su inpiracion ta bini for di susesonan di tur dia como tambe su deseonan di algun dia por bolbe bek su cas; Aruba.

Joe Fortin a yega di publica algun poema online y e reaccionnan tabata hopi positivo. E reaccion aki a entusiasma Fortin pa compila su poemanan y publica un buki di poesia. Un publicacion di 100 pagina titula ‘Canto di lama’ ta referi na e echo cu e poeta y autor sa contempla cant’i lama y na mes momento laga su mes ser inspira pa e canto di e olanan.
Gosa siguientemente di un di e poemanan di Joe Fortin, titula ‘Wardando’.

Wardando

Akinan mi ta keda sinta warda bo
Te ora cu bo yega pa brasa mi
Pa bisa mi cu mi no tin di warda mas
Mi sa cu e tempo lo yega un dia
Esaki ta skirbi cu nubianan den cielo
Palabranan blanco, tristo y suave
E streanan ta midi e dia exacto cu nan luz
Tur anochi nan ta ripiti e fecha di nos encuentro
Mi no tin pura pasobra e dia lo yega, esey mi sa
Pero si mi ta ansha paso tempo ta bula bay
Duna mi un seña pa mi curason por sosega
Mi lo keda sinta warda bo cu mi wowonan cera.

Otro obranan literario di Joe Fortin, ta Tartamudo: diesdos storia cortico cu ta mescla diferente nivel di realidad. E storianan aki ta hiba e lector den un laberinto di duda sin salida, cu e intencion di confundi y despista. Ademas, Fortin tambe a publica tambe e obra ‘City Store’  cual ta contene 11 storia cortico cu e biaha aki ta mescla diferente realidad cu e mundo di fanatasia y (mal) soño.